تحية لأرواح شهداء و مصابى ماسبيرو ، جميعهم ، ولا نخص مينا وحده بالتحية ، فكلهم سواء ، قدموا أرواحهم الطاهرة النقية من أجل قضاياهم العادلة .
مينا حىّ
***
- مينا حـــــىّ
مـينا مش ممكن يمــوت
***
- مينا جوة قلوبنا ضىّ
نبرة عايشة فى كل صوت
مينا نسمة فى كل حىّ
فكرة ما يغيبها موت
شُعلة فى الضلمة تبان
طول ما تتفتح ببان
كانت زمان
متقفلة
أمام طوفان
الأسئلة
المشكلة
والمهزلة
تدهس ولادنا الدبابات
***
- مينا مات ..؟!
- لأ ... مينا حىّ
مينا مش ممكن يموت
***
- مينا صوت فى الحق هادر
هو صرخة كل صابر
مينا للمظلوم لسان
مينا كان وسط الميدان
يوم ما قالوا الثورة قامت
والشيطان فى الحق ساكت
لما طالت
لما باخت
مينا قام هز السكات
***
- مينا مات ..؟!
- لأ ... مينا حىّ
مينا مش ممكن يموت
***
- مع إنها لحظة زمن
مع إنه كان لابس كفن
ولكنه بيحب الحياه
ولانه بيحب الوطن
ويجود بروحه عشان رضاه
ما كانش ممكن يهمله
أو يخذله
أو يأذى حد ويقتله
لو كان مخبى اسلحة
ما كانش راح فى المذبحة
ولان مينا كان أسد
ما هربش من صوت الدانات
***
- مينا مات ..؟!
- لأ ... مينا حىّ
مينا مش ممكن يموت
***
- قالوا مينا راح بلاش
كدبوا
مينا اليوم دا ... عـــــــــــــاش
و قبله عاش مليون شهيد
إيه الجديد ...!
بإختصار.......
مينا كان ميت فعاش
عاش يا صاحبى
وأى عيشة ...!
و اللا فاكر دية عيشة ..؟!
دية ..! عيشة....؟!
إياك تكون ما فهمتهاش
وإللى ضحى ما انتهاش
***
تبكى...!
تبكى ليه ..؟!
كفاياك خيابة
تبكى ليه ..؟!
ما بلاش عبط
مينا اخونا
شهيد قبط
واللى مش عارف نقوله
يعنى إيه دا
" شهيد قبط "
تلاقيك ما تعرفش الحكاية
***
مينا الدلوقتى فين ...؟
ومين معاه...؟
آآآآآآه
يا هناه...!
قول معاى
يا هناه
تبكى ..!
يبكوا عليك
يوم ما تتنعم معاه
قول معاى
مسيحنا جاى
ومينا حىّ
مينا حىّ
***
كلمات
رمزي حلمي لوقا
