فى المنام
***
على فكرة .. أنا بكتب "عَامِّى "
.. رغم إنى ؛ لا جاهل ولا "أُمِّى"
.. بصراحة ؛ مش راح أعقدها
.. وحياتنا ها نُفك عُقدها
.. ونبَسَّطها ونحلِلها
.. يمكن نفهمها ونِعقِلها ..
ونفهم كل السامعين
***
ذات مرة كان نايم أخويا
.. فى منامه راح زاره أبويا
.. سأله ؛يجى ميت ألف سؤال
..سأله عن كل الأحوال
..الطيب والردى والزين .
***
عامل إيه فى الدنيا يا إبنى
.. همك فى الآخرة مغلبنى
.. أنا سايبك وانت فى نهائى
. .حبك كان دائى وترياقى.
طول عمرك شاطر يا حبيبى
.ونجاحك كان هو نصيبى .
. الأول دايما ًع الدفعة .
.والأول دايما ً له الشفعة.
. فى الجامعة على طول يتعين .
. مستقبل مضمون ؛ مش هين .
. وبعلمك تخدم فى بلادك.
.وتحقق أحلام أجدادك.
.فى الجامعة تشرح وتعلم .
.أبحاثك تحفر وتعلم .
. وتلف الدنيا وتتعلم ..
من أمريكا لصور الصين
***
ثلاثين سنة مروا وزيادة .
.علمتك؛ " السعى عبادة ".
. فى الدنيا تسعى بمجهودك .
. ورئيسك تثبت له وجودك .
. بذراعك تبنى المستقبل .
. وحلاله بس اللى بتقبل ..
..كيف أحوالك.. فين أراضيك .
. بدعى رب الكون يراضيك .
. تلاقيك فى وظيفتك متبغدد .
.مركز عال ..شغال ؛ مُتجدد .
. سواقك قدام عرابيتك.
. وعيالك دول زينة بيتك .
.ربيهم زى ما ربيتك .
.علمهم أحسن تعليم .
. ده التعليم مجانى يا أخونا .
. ووظايفهم دايما مضمونة .
.إشتراكيتنا بتضمنها .
. صحة ودعم ؛غذا وتعليم.
.ومساواة معاشة ؛ لا بيه ولا باشا .
. دى حياتنا فندام وبغاشة
..مش زى الناس التانين
***
آخر مرة شوفت أخويا .
. غرقان فى الشحم ومتبهدل .
. له كرش مشحم ومهدل ..
بيسوق التوك توك بالعافية .
. وديونه ؛ جايبة له الكافية .
. عزوبية وفقر وأمراض .
. وخلل فى المخ وأعراض ..
بتليق بزعيم المجانين
***
آه يا أبويا .. فين أيامك .
. عايشين فى الأيام الشين
خادت الخير والله فى منامك.
.و أهو فى الدنيا إسمنا عايشين
أيامنا مش زى أيامك .
.رأسماليتنا بوشين
وش بيغضب لما يشوفنا .
.ووش بيضحك للعايشين
***
بقلم
رمزى حلمى لوقا